يوميات شلبى وشلبيه (2)

هو وهي ...... وآراء الأهل الشخصية

مشاكل كثير في الحياة الزوجية بيكون سببها نشر الزوج او الزوجه لأراء الأهل الشخصية ، ولما

المشاكل نداويها وترجع المية لمجاريها ، بتظل في القلوب نقطة كره للأهل صعب نمحيها .

شلبية : ماتنساش يا شلبي يا حبيبي تحاول تيجي بدري انهاردة علشان ماما وبابا جايين عندنا .

شلبي : غريبة ....وأيه المناسب السعيدة ؟؟؟!!!

شلبية : وهي لازم تكون فيه مناسبة علشان أهلي يزورونا ؟؟؟

شلبي : هما مش كانوا عندنا الشهر اللي فات .... لما عزمناهم على ممبار ؟؟؟

شلبية : انت حسبتها عليهم عزومة ؟؟؟.... مش انت اللي اشتريت ممبار كثير وادبست فيه وكان هيترمي

في الزبالة وخلتني أعزمهم ، وبعدين يعني فيه حد يتفشخر بعزومة ممبار ؟؟؟... ده رز بطماطم وبصل

مش لحمة . وأنا اللي ظهري انقطم في حشيه .

شلبي : طيب واللي ييجي يزور حد وهياكل عنده ... مش واجب عليه يجيب في أيده حاجة ، ولو حتى كيلوا

حرنكش ؟؟؟ .... مش هي دي الأصول ؟؟؟

شلبية : ولما دي الأصول .... ليه أهلك مابيعملوهاش ؟؟؟ .... ياما اتعزموا عندنا ، وجولنا أيد ورا وأيد قدام .

شلبي : أهلي بياكلوا من خيري ومن عرق جبيني .

شلبيه : وكمان الشقة اللي أهلي بيجولنا فيها بفلوسهم .

شلبي : انتي بتعيريني بشقة أبوكي .... هي لولا الشقة كان حد بصلك .

شلبية : يبقى انت داخل على طمع زي ما أمي قالت ... ياريتني سمعت كلامها قالت لي بكرة تندمي .

شلبي : وهي أمك كانت لقيت حد غيري اتقدم لك علشان تتعزز ؟؟؟... عندها حق أمي : يا واخذ القرد

على ماله يغور المال ويبقى القرد على حاله .

شلبية : مابقاش الا أم شبشب بلاستيك كمان وتتكلم ... أنا اتقدم لي بدل الواحد عشرة ... بس أنا اللي

صمت وفطرت على بصلة على رأي بابا .

شلبي : ياريتك كملتي صيامك ... كمان ده بقى له صوت وكلمة ... من امتى لعبة الست بيتكلم ؟؟؟

شلبية : ربنا يديكي طولة العمر يا خالتي ... قالت دول ناس شكلهم بيئة .

شلبي : مش خالتك دي بردواالقرشانة اللي عاملة نفسها عيلة وبتلبس استريتش ؟؟؟ ... دي أختي لما

شافتها قالت هي ومراتك فولة وانقسمت نصين .

شلبية : كمان العانس بقى لها في الطبل نقرة .... اللي اخويا لما قلت له حاول تشوف لها عريس من

أصحابك ينوبنا فيها ثواب ... قال لي دا القطر دايس على راسها زي أخوها .

شلبي : ودلوعة أمه البنوتة الصايع ... مش عاجبه شكلي ... اللي أبويا الله يرحمه كان فاكر انه أختك .

شلبية : والله عال ... كمان الحلاق بيعرف يتريق على الناس

شلبي : اخرسي قطع لسانك ... هي حصلت تتكلمي على الأموات بالشكل ده .

شلبية : هي حصلت تمد ايدك علي وتضربني .

شلبي : امال كنتي متوقعة أيه لما تشتمي أبويا بدل ما تدعيله بالرحمة ؟؟؟

شلبية : رحمة أيه وهو اللي كان سبب وجودك في الدنيا ، وتعاستي اللي أنا فيها .

شلبي : ماحدش غاصبك على التعاسة دي ... الباب يفوت ناقة .

شلبية : لا وانت الصادق ... يفوت جمل ... دي شقتي أنا .

شلبي : طيب ياشلبية ... انتي طالق من الساعة ديه